Sunday, March 18, 2018

(B)பிட்டு (B)பிட்டா போட்டுட்டு போறேன்!

அனைவருக்கும் வணக்கம். முன்பே கூறியது போல இன்னும் சரியான வேலை கிடைக்கவில்லை. தேடிக்கொண்டே இருக்கிறேன். பழைய நிறுவனத்தில் கூட துண்டு போட்டுள்ளேன். யோசித்துப் பார்த்தால், அந்த நிறுவனத்தில் அடிக்கடி வெளிநாட்டுப் பயணம் போக வேண்டி இருக்கும். அதனால், அங்கு சென்ற போதெல்லாம் அடிக்கடி பதிவுகள் போட முடிந்தது. இப்போதே முழுக்க இங்கேயே இருப்பதால், அலுவல் பிரச்சினை, வீட்டுப் பிரச்சினை என ஏதாவது வந்து விடுகிறது.

அது மட்டுமின்றி, பழைய நிறுவனத்தில் அலுவல் நேரம் நம் இஷ்டம்தான் (Flexible timings). எனவே, அலுவலகத்தில் இருந்து நள்ளிரவில் வந்து, ஓரிரு மணி நேரத்தில் பதிவிட்டு விடுவேன். இப்போதோ இரவு 8 மணிக்கு வந்தால், மனைவி, மக்களோடு சண்டை போட்டு விட்டு, மகளுக்கு கதை சொல்லி தூங்க வைத்து விட்டு, கொஞ்ச நேரம் அலுவலக வேலை, பிறகு தூக்கம். சனி, ஞாயிறு ஏதாவதொரு வேலை.

இதுவரை நான் சொன்ன எல்லாமே நொண்டி சாக்குதான். இதே போல ஒரு நிலைமையில்தான் 10 வருடங்களுக்கு முன் டைரி எழுதுவதை விட்டேன், அதே போல பதிவிற்கும் ஆகி விடக்கூடாது. அப்புறம் என்னுடைய ரசிகர்கள் நிலை என்னாவது. 

அமேசான் பிரைம்: 

முன்பு நிறைய படங்களை தமிழ் ராக்கர்ஸில் தரவிறக்கம் செய்து பார்ப்பேன். சற்றே குற்ற உணர்ச்சியுடன்தான். இப்போது அமேசான் பிரைம் வந்த பிறகு, அதில்தான் பார்க்கிறோம். வருடத்திற்கு 500/- எனும்போதே வாங்கி விட்டேன். அடுத்த வருடம் ஆயிரமாம். 

இன்னும் மலையாளப் படங்கள் வரவில்லை. அதே போல இன்னும் நிறைய படங்கள் வரவில்லை. குறிப்பிட்ட சில படங்கள் மட்டுமே வருகிறது. தெலுங்கில் வரும் அளவிற்கு தமிழில் வரவில்லை. நெட்பிலிக்ஸ் அல்லது சன் நெக்ஸ்ட் பரவாயில்லையே என்றும் தோன்றுகிறது. 

நெட்பிலிக்ஸ் தமிழில் எப்படி என்று தெரியவில்லை. பல நல்ல, சுமாராக ஓடிய, புது முகங்கள் இருந்த திரைப்படங்களை (பலூன், உள்குத்து, திருட்டுப் பயலே 2) இன்னும் எதிலும் காண முடியவில்லை. தமிழ் ராக்கர்ஸ் தவிர. 

இன்னும் வருடத்திற்கு மொத்தமாக இரண்டாயிரம் செலவழிப்பது பிரச்சினை இல்லை. ஏனென்றால், குடும்பத்துடன் அரை நாள் செலவிட்டு ஒரு படம் பார்க்கவே ஆயிரம் ருபாய் தேவைப்படும்போது, வருடம் முழுவதும் வீட்டில் இருந்து பார்க்க 2000 செலவழிப்பதில் தவறில்லை. 

இப்போது இன்னும் நிறைய இணைய தொடர்கள் (web series) வேறு வருகிறது. என்ன, கெட்ட வார்த்தைகளும், படுக்கையறைக் காட்சிகளும் நிறைய வருகின்றன. 

திரைப்பார்வை: 


போன ஜூன் மாதப் பதிவில் திரைப்படங்கள் பற்றி எழுதியது. அதன் பின் எழுதவேயில்லை. இன்னும் சொல்லப் போனால், எழுதும் அளவிற்கு என்னை இந்தப் படங்களும் கவரவில்லை. ஓரளவிற்கு பரவாயில்லை என்றால், இவன் தந்திரன், விக்ரம் வேதா, நிபுணன், அறம், திருட்டுப் பயலே 2, அருவி. இவை எல்லாம் 2017ல் வெளியானவை. 

இந்த வருடம் வந்த படங்களில் உருப்படியாக, என் பெண் உள்பட அனைவரும் ரசித்த படம் குலேபகாவலி மட்டும்தான். இனியாவது நல்ல படங்கள் வரும் என நம்புகிறேன். 

அரசியல்: 

இன்னும் நான் மட்டும்தான் கட்சி ஆரம்பிக்கவில்லை என நினைக்கிறேன். மற்ற அனைவரும் ஆரம்பித்து விட்டார்கள். சந்தானம் "திட்றதுக்கு கெட்ட வார்த்த கிடைக்காம திட்டினதையே திட்டிக்கிட்டிருக்க" என்பது போல சில கட்சிகள். 
தேசியமும் இல்லை, திராவிடமும் இல்லை, மய்யம் என ஒன்று, 
அம்மா என்றாலே அதில் அண்ணா, தேசியம், எல்லாமும் அம்மாவிற்குள் அடக்கம் என்றொரு கட்சி. 
பகுதி நேர அரசியல்வாதி ஒருவர், 
ஏற்கனவே உள்ள பெயரில் 'இ' மட்டும் சேர்த்து ஒரு கட்சி என நகைச்சுவைக்கு குறைவில்லை. இன்னும் கொஞ்ச நாள் பார்ப்போம். 

ஆலோசனை தேவை: 

அடிக்கடி பதிவின் முகவரி .in மற்றும் .com இடையே அல்லாடுகிறது. முன்பு ஒரு முறை DD அவர்கள் (திவ்யதர்ஷினி இல்லீங்க, திண்டுக்கல் தனபாலன் அண்ணாச்சி) .inக்கு பதிலாக .comல் திறக்க ஒரு வழி சொன்னார். இதுவரை அதுதான் உள்ளது. இப்போது திடீரென .com போட்டால் .in என்று மாறி, வலைப்பதிவு திறக்க மாட்டேன் என்கிறது. சில முறை அதுவே .com என மாறிக் கொள்கிறது. ஏதேனும் ஆலோசனைகள் இருந்தால் கூறவும். நான் வன்பொறியாளன், மென்பொறியாளன் அல்ல.  

3 comments:

  1. கீழ் உள்ள பதிவின் முடிவில் உங்கள் கேள்விற்கான பதில் உள்ளது... நன்றி...

    http://dindiguldhanabalan.blogspot.com/2014/03/Speed-Wisom-3.html

    ReplyDelete
    Replies
    1. அருமையான தொகுப்பு. மிக்க நன்றி!!

      Delete
  2. கீழ் உள்ள இணைப்பிலும் விளக்கம் உள்ளது...

    http://dindiguldhanabalan.blogspot.com/2016/12/Blog-Tips-4-6.html

    ReplyDelete

உங்களின் கீழ்/மேலான கருத்துக்கள்..